Тадбиркорга кўп қаватли уй қурилишини олиб беришни ваъда қилган фирибгарлар ушланди
Бош прокуратура ҳузуридаги Департамент ҳамда ДХХнинг Сирдарё вилояти бошқармалари томонидан тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилди.
Текширувда муқаддам фирибгарлик жинояти учун судланган фуқаро Р.Р. “A.Р.” МЧЖ раҳбарининг ишончига кириб, унга Жиззах вилояти Зафаробод туманида кўп қаватли уйлар қурилиши режалаштирилганлигини айтган. Шундан 5 қаватли 1 та уй қуриш учун шартнома тузишда танишлари орқали ёрдам беришини ваъда қилган. Бунинг эвазига эса ундан фирибгарлик йўли билан 5 000 АҚШ долларини олган вақтида ашёвий далиллар билан ушланди.
Ҳозирда ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, бундан аввал захирадаги ер майдонини сотмоқчи бўлган фирибгар ушлангани ва Бўстонлиқ туманида 5 гектар ерни 150 минг АҚШ долларига олиб беришни ваъда қилган шахс қўлга олингани ҳақида хабар берилганди.
Шунингдек, Жарқўрғон туманида захирадаги ерни сотмоқчи бўлган фирибгарга жазо қўлланилганди.
Чўлпоной Аҳмедова
