Жиззахда вояга етмаганлар 9 ой ичида қанча жиноят содир этгани очиқланди
Жиззах шаҳар давлат хизматлари марказида “Жиззах шаҳрида жорий йилда вояга етмаганлар ишлари бўйича Жиззах шаҳар идоралараро комиссияси томонидан олиб борилган ишлар, камчиликлар, истиқболли режалар” мавзусида ОАВ учун матбуот анжумани ўтказилди. Бу ҳақда Жиззаҳ вилояти ҳокимлиги хабар берди.
Қайд этилишича, шаҳар ҳудудида комиссия аъзолари ва ички ишлар бўлими ходимлари билан ҳамкорликда олиб борилаётган тарғибот-ташвиқот ишларига қарамасдан 9 ой давомида вояга етмаганлар томонидан 7 та жиноят содир этилган. Ушбу кўрсаткич ўтган йилнинг мос даврига нисбатан ўзгаришсиз қолган.
Шунингдек, комиссия таклифи ва тўпланган ҳужжатларга асосланиб ўз фарзандини ноқонуний равишда чет давлатлардаги таълим муассасаларига жўнатган 7 нафар ота-она суд қарори билан маъмурий жавобгарликка тортилган. Комиссиянинг жиноят ишлари бўйича Жиззах шаҳар судига киритган илтимосномасига асосан 1 нафар вояга етмаган ўқувчи республика қиз болалар махсус ўқув-тарбия муассасасига жойлаштирилди.
Маълумот учун: Жиззах шаҳри аҳолиси сони 65 минг 760 нафар, унинг 27 фоизидан кўпроғини вояга етмаганлар ташкил этади. Шаҳар ҳудудидаги умумтаълим мактаблари, ўрта махсус касб-ҳунар мактаблари, академик лицейлар ҳамда мактабгача таълим муассасаларида 47 мингдан зиёд вояга етмаган болалар таълим-тарбия олмоқда.
Бундан аввал онлайн қиморда ютқазган йигит ўғирлик содир этгани, Наманганда 23 ёшли йигит шифокор аёлнинг юзига кислота сепгани, Қаршидаги оммавий жанжал оқибатида 19 ёшли спортчи тўппончадан ўқ егани ҳамда Андижонда 20 ёшли йигит бозорда тенгдошини пичоқлаб, унинг ўлимига сабабчи бўлгани ҳақида хабар берилганди.
