Сурхондарёда фирибгар ўн тоннадан ортиқ саримсоқ пиёзни ўзлаштириб кетди
Ҳозирда бировнинг ҳақидан қўрқмаган айрим кимсалар фирибгарлик йўли билан ўзганинг мол-мулкини ўзлаштириб, ишончига кириб олиб талон-торож йўли билан жиноят содир этаётганлар кўп учрамоқда. Бугунги кун “қаҳрамон”лари — ана шундай ҳалол ва ҳаромнинг фарқига бормаган кимсаларни кўриб дилингиз хира тортади.
Хусусан, Сурхондарё вилояти Жарқўрғон туманида фирибгар ўн тоннадан ортиқ саримсоқ пиёзни ўзлаштириб кетгани аниқланди. Бу ҳақда вилоят ИИБ ахборот хизмати хабар берди.
Маълум қилинишича, Жарқўрғон туманида 2021 йил 8 сентябрь куни Тошкент шаҳрида яшовчи, З.Зокир туман ИИБга ариза билан мурожаат қилган. Унда айтилишича, 28 июль куни туманнинг “Қорабуро” маҳалласида яшовчи опаси З.Зайнабнинг уйида сақлаб қўйган 10 тонна 477 кг. саримсоқ пиёзни Андижон вилоятида яшовчи К.Карим жами 183 миллион 347 минг 500 сўмга савдолашиб олиб, пулини маҳсулотни сотганидан кейин беришини айтган. Лекин у пулни ҳозирги кунга қадар бермай келяпти.
Ҳозирда К.Каримга нисбатан Жиноят кодексининг 168-моддаси 4-қисми «а» банди билан жиноят иши қўзғатилган.
Бундан аввал Хивада тадбиркорга тўлов талабномани йўқотишни ваъда қилган фирибгар ушлангани, Жиззахда фирибгар ўз дўстининг 3500 АҚШ долларини ўмаргани, Бухорода ногиронлик нафақасини расмийлаштириб беришни ваъда қилган фирибгар ҳамда сохта долларга телефон сотиб олган фирибгар қўлга олингани ҳақида хабар берилганди.
