Ўзингдан чиққан балога: собиқ банк ходими фирибгарга айланди
Бектемир туманида 11 нафар ходимнинг номига микроқарз олган собиқ баанк ходими қўлга олинди.
Бош прокуратура ҳузуридаги Департаментнинг Бектемир туман бўлими томонидан ўтказилган терговга қадар текширувда фуқаро С.Э. 2018-2021 йилларда Тошкент шаҳри бўйича Ғазначилик бошқармасида турли лавозимларда ишлаган даврида 11 нафар ходимнинг номига 2 та тижорат банкдан жами 212 миллион сўм микроқарз ажратган. Бундан 11 нафар ходимнинг ҳеч қандай хабари бўлмаган. Собиқ банк ходими кредит маблағларини ўзининг шахсий эҳтиёжлари учун сарфлаб, талон-торож қилгани аниқланган.
Ушбу ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, ҳозирда тергов ҳаракатлари олиб борилмоқда.
Эслатиб ўтамиз, аввалроқ Сергелида 32,5 минг долларни ўзлаштириб юборган банк кассири ва бош мутахассисига жиноят иши қўзғатилгани, Миришкорда банк ходимлари аралашган ноқонуний "ўйин" фош этилгани, шунингдек, собиқ банк ходими 9 нафар фуқаронинг омонатига хиёнат қилгани ҳақида хаабар берилганди.
