Ўзбекистонда яна сел-сув тошқини хавфи эълон қилинди
Айрим ҳудудларда кучли ёмғир сабаб ёмғир сувлари тўпланиши ва ҳудудларни сув босиши эҳтимоли ҳам мавжудлиги қайд этилган.
Ўзгидромет 26 майдан 1 июнга қадар республиканинг тоғолди ва тоғли ҳудудларида сел-сув тошқини хавфи мавжудлиги ҳақида огоҳлантирди.
Маълум қилинишича, кутилаётган ёмғирлар сабаб айрим ҳудудларда сел келиши, сой ва кичик дарёларда сув сатҳи кескин кўтарилиши мумкин.
Сел-сув тошқини хавфи қуйидаги ҳудудларда кузатилиши эҳтимоли мавжуд:
— Қашқадарё вилоятининг Яккабоғ, Деҳқонобод, Чироқчи, Китоб, Шаҳрисабз, Қамаши ва Ғузор туманларида;
— Сурхондарё вилоятининг Сариосиё, Узун, Олтинсой, Денов, Бойсун, Шеробод, Шўрчи, Қумқўрғон ва Музробот туманларида;
— Самарқанд вилоятининг Ургут, Самарқанд, Булунғур, Нуробод, Қўшработ, Каттақўрғон, Паяриқ, Жомбой ва Иштихон туманларида;
— Навоий вилоятининг Хатирчи, Навбаҳор, Нурота, Конимех ва Кармана туманларида;
— Жиззах вилоятининг Зомин, Бахмал, Ғаллаорол, Шароф Рашидов, Фориш ва Янгиобод туманларида;
— Тошкент вилоятининг Оҳангарон, Бўстонлиқ, Паркент, Пискент, Ўрта Чирчиқ ва Юқори Чирчиқ туманлари, шунингдек Ангрен ҳамда Олмалиқ шаҳарларида;
— Наманган вилоятининг Поп, Косонсой, Чортоқ, Чуст, Наманган ва Янгиқўрғон туманларида;
— Фарғона вилоятининг Сўх, Шоҳимардон, Фарғона ва Бешариқ туманларида;
— Андижон вилоятининг Андижон, Асака, Жалақудуқ, Қўрғонтепа, Пахтаобод, Избоскан, Хўжаобод, Марҳамат туманлари ҳамда Хонобод шаҳрида.
«Ўзгидромет» тоғолди ва тоғли ҳудудларда яшовчи фуқаролар, дам олувчилар ҳамда ушбу ҳудудларда ҳаракатланувчи ҳайдовчиларни эҳтиёткорлик чораларини кўришга чақирди.
Шунингдек, айрим ҳудудларда кучли ёмғир сабаб ёмғир сувлари тўпланиши ва ҳудудларни сув босиши эҳтимоли ҳам мавжудлиги қайд этилган.
Эслатиб ўтамиз, 19 май куни Наманган вилояти, Жиззах вилояти ҳамда Қашқадарё вилоятининг айрим ҳудудларида сел кузатилган эди. Хусусан, Қашқадарёнинг Деҳқонобод туманидаги Ғинжак қишлоғида юз берган сел оқибатида адирда мол боқиб юрган 25 ёшли йигит ҳалок бўлган.
Шунингдек, 21 май куни Жиззах, Тошкент, Қашқадарё, Навоий, Сурхондарё ва Самарқанд вилоятларининг айрим ҳудудларида сел ва ёмғир сувлари оқими қайд этилган. Навоий вилоятидаги сел оқибатида тўртта автомобиль ҳамда бир нечта уй зарар кўрган.
22–24 май кунлари эса Сурхондарё, Қашқадарё, Жиззах ва Наманган вилоятларида яна сел ҳодисалари кузатилган эди. 22 май куни Қамчиқ довонида йўлга лой ва тош аралаш сел сувлари тушгани сабаб автомобиллар ҳаракати вақтинча чеклангани хабар қилинган эди.
