Конгрессда китоб-альбомларнинг янги жилдлари тақдим этилади
Шу йилнинг 13–21 сентябрь кунлари Тошкент, Хива ва Нукус шаҳарларида Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамиятининг «Ўзбекистон маданий меросини ўрганиш, сақлаш ва оммалаштириш – замонавий босқичда” мавзусида V Халқаро конгрeсси бўлиб ўтади.
Конгресс доирасида бир қатор тадбирлар белгиланган. Жумладан, нашрдан чиққан китоб-альбомларнинг янги жилдларини жаҳон музей ва кутубхоналарига тантанали топшириш маросими бўлиб ўтади.
Бутунжаҳон жамиятининг навбатдаги конгрессида Ўзбекистон, Россия, АҚШ, Германия, Италия, Венгрия, Франция, Буюк Британия, Туркия, Япония, Албания, Австрия, Афғонистон, Қозоғистон, Греция, Исроил, Ҳиндистон, Иордания, Эрон, Хитой, Ливан, Мўғулистон, БАА, Нидерландия, Украина, Польша сингари 40 га яқин мамлакатдан 350 нафар тарихчи ва шарқшунос олимлар иштирок этиши кутилмоқда.
Конгресс Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамиятининг фаолиятига бағишланган ялпи йиғилиш билан бошланади. Шунингдек, Бутунжаҳон жамиятининг 2021-2025 йилларга мўлжалланган Йўл харитаси муҳокама қилинади.
Анъанага кўра, конгресс Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамияти иштирокчиларининг Ўзбекистон Республикаси Президентига мурожаати ва якуний резолюциясини қабул қилиш билан якунланиши режалаштирилган.
Эслатиб ўтамиз, аввалроқ Тошкент халқаро кинофестивалининг ишчи гуруҳи ўз фаолиятини бошлагани, “Ўзбекистон маданий мероси – янги уйғониш даври пойдевори” V Халқаро Конгресси ўтказилиши, 14-15 сентябрь кунлари Хивада “Марказий Осиё дунё цивилизациялари чорраҳасида” Халқаро маданият форуми ўтказилиши ҳамда Турк киносининг “Ипак йўли дурдонаси” Тошкент халқаро кинофестивалида намойиш этилиши ҳақида хабар қилинганди.
