Банкни "чув туширмоқчи бўлган" тадбиркорларнинг кирдикорлари фош этилди
Ҳозирда ушбу ҳолат бўйича жиноят иши қўзғатилиб, тергов ҳаракатлари ўтказилмоқда.
Бош прокуратура ҳузуридаги Иқтисодий жиноятларга қарши курашиш департаментининг хабар қилишича, департаментнинг Сирдарё туман бўлими томонидан терговга қадар текширувлар ўтказилди.
Қайд этилишича, “A.Ф.” МЧЖ раҳбари Т.Г. банк муассасасидан замонавий иссиқхона қуриш учун 5,5 миллиард сўм кредит ажратилишига эришиб, гаровга қўйилган мулкни сохта маълумотлар киритиш орқали тақиқдан чиқариб сотиб юборганлиги натижасида банк манфаатларига 3,8 миллиард сўм зарар етказилганлиги маълум бўлди.
Шунингдек, “С.Б.” МЧЖ раҳбари М.Р. МЧЖга қурилиш моллари сотиб олиш учун ажратилган 5 миллиард сўм кредит эвазига гаровга қўйилган мулкни сохта маълумотлар киритиш орқали тақиқдан чиқариб сотиб юборганлиги натижасида банк манфаатларига 4,3 миллиард сўм зарар етказганлиги аниқланган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят ишлари қўзғатилиб, тергов ҳаракатлари ўтказилмоқда.
Эслатиб ўтамиз, аввалроқ Самарқандда туман ХТБ мудири ўринбосари пора билан ушлангани, Паркент тумани тиббиёт бирлашмаси мансабдорлари 1,5 миллиард сўмни ўзлаштириб юборгани, Термизда ер савдоси билан боғлиқ фирибгарлик ҳолати фош бўлгани ҳамда Бухорода ҳокимлик захирасидаги ерни 8 000 АҚШ долларга сотмоқчи бўлган шахс қўлга олингани ҳақида хабар берилганди.
