Термизда ер савдоси билан боғлиқ фирибгарлик ҳолати фош бўлди
Ҳозирда ушбу ҳолат бўйича жиноят иши қўзғатилиб, тергов ҳаракатлари ўтказилмоқда.
Бош прокуратура ҳузуридаги Иқтисодий жиноятларга қарши курашиш департаментининг хабарига кўра, департаментнинг Термиз туман бўлими томонидан фуқароларнинг ҳуқуқ ва манфаатларини ҳимоя қилиш юзасидан терговга қадар текширув ўтказилди.
Маълум қилинишича, фуқаролар Т.Х. ва Б.А.лар олдиндан тил бириктириб, туман ҳокимлиги захирасида бўлган 10 сотих ер майдонини фуқаро М.га ўзларига тегишли эканлигини айтган. Ушбу ер майдонини расмийлаштириб бериш эвазига фирибгарлик йўли билан қўлга киритгани аниқланди. Улар 3 минг 300 АҚШ доллари ҳисобидан 9 миллион сўмни ўз ихтиёри билан қайтарганликлари процессуал тартибда расмийлаштириб олингани маълум бўлди.
Қайд этилишича, мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, Бўстонлиқ туманида 5 гектар ерни 150 минг АҚШ долларга олиб беришни ваъда қилган шахс ушланганди.
Аввалроқ Хоразмда ноқонуний ер сотаётган шахслар ушлангани, Фарғонада "аукцион" орқали арзон ер майдони олиб бераман деб 60 миллион сўмни қўлга киритган шахс қўлга олингани ҳамда ДХХ томонидан ноқонуний ер сотиш ҳолатларининг олди олингани ҳақида хабар берилганди.
