Jizzaxda “Hyundai” va “KamAZ” ishtirokidagi YTH oqibatida haydovchilardan biri halok bo‘ldi
Jizzax viloyatining Paxtakor tumanida “Hyundai” yuk mashinasi tirkamasida yuk avtomobili olib ketayotgan “KamAZ”ga borib urilishi natijasida YTH sodir yuz berdi. Oqibatda, haydovchilardan biri halok bo‘ldi. Bu haqda viloyat YHXB matbuot xizmati xabar berdi.
Maʼlum qilinishicha, voqea 20-sentabr kuni soat 00:55 lar atrofida Paxtakor tumani M-39 Toshkent — Termiz avtomobil yo‘lining 957-kilometrida yuz bergan. Haydovchi “KamAZ-5410” yuk mashinasini boshqarib ketayotib, belgilangan joydan qayrilayotgan vaqtida o‘sha yo‘nalish bo‘yicha harakatlanib kelayotgan “Hyundai” yuk mashinasi “KamAZ”ning yon qismiga kelib urilgan.
Oqibatda, “Hyundai” yuk mashinasining 25 yoshli haydovchisi olgan tan jarohatlari sabab voqea joyida halok bo‘lgan.
Qayd etilishicha, ushbu YTHga “Hyundai” haydovchisining charchoq alomatlari bilan rulga o‘tirgani sabab bo‘lgan.
Avvalroq Andijonda “ZIL” yuk mashinasi YTHga uchragani, Sirdaryoda uxlab qolgan yuk mashinasi haydovchisi YTH oqibatida vafot etgandi. Shuningdek, Surxondaryoda “Damas” haydovchisi yuk mashinaga borib urilishi oqibatida bir kishi vafot etgani, Sariosiyo tumanida yuk mashinasi va “Lacetti” ishtirokida yo‘l-transport hodisasi sodir bo‘lgani, Qoraqalpog‘istonda Qozog‘iston fuqarosi YTHga uchrab, vafot etgani hamda Qashqadaryoda “Cobalt” mashinasi “Lacetti” bilan to‘qnashib ag‘darilib ketgani haqida xabar berilgandi.
