Наманганда фуқарога 1,2 гектар ер майдонини олиб беришни ваъда қилган шахс қўлга тушди

 

Бош прокуратура ҳузуридаги Департаментнинг Наманган вилоят бошқармаси томонидан тезкор тадбир ўтказилди. Унда “Ш.” боғдорчилик-узумчилик ширкати аъзоси К.У. ўзи ва қўшнисига тегишли бўлган Тошкент вилояти, Пискент туманида жойлашган жами 1,2 гектар ер майдонини фуқаро У.га фирибгарлик йўли билан 58 200 АҚШ долларига сотишга уринган.

 

Маълум бўлишича, танишлари ёрдамида ерга эгалик ҳуқуқини берувчи ҳужжатларни тайёрлаб бериши эвазига олдиндан 10 000 АҚШ доллари ва 75 миллион сўмни олган вақтида ашёвий далиллар билан ушланган.

 

Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.

 

Эслатиб ўтамиз, Тошкент вилоятида 1 409 та ҳолатда 263,3 гектар ер майдонида ўзбошимчалик билан эгаллангани ва ноқонуний қурилмалар қурилгани маълум бўлганди.

 

Аввалроқ Фарғонада "аукцион" орқали арзон ер майдони олиб бераман деб 60 миллион сўмни қўлга киритган, 10 минг доллар эвазига уй-жой қуриш учун ер олиб бермоқчи бўлган, Бўстонлиқ туманида 5 гектар ерни 150 минг АҚШ долларга олиб беришни ваъда қилган шахс ушлангани ҳамда Захирадаги ер майдонини сотмоқчи бўлган фирибгар қўлга олингани ҳақида хабар берилганди.