Дорихона раҳбари “Регапен”ни харидорга 125 минг сўмга пулламоқчи бўлди

 

Бош прокуратура ҳузуридаги департаментнинг Олмазор туман бўлими томонидан ИИБ ходимлари билан тезкор тадбир ўтказилди. Бу ҳақда Иқтисодий жиноятларга қарши курашиш департаменти хабар берди.

 

Унда айтилишича, “А” МЧЖга қарашли дорихона раҳбари Ж.Т. харидорга 5 дона “Регапен” номли кучли таъсир қилувчи дори воситасини 125 минг сўмга сотганлиги аниқланди. Ушбу дорихонадан тегишли ҳужжатлари бўлмаган 89 дона “Karbaleks”, 51 дона “Регапен” ва 50 дона “Карбамазепин” номли дори воситаси ашёвий далил сифатида олинган. 

 

Худди шундай ҳолат “F” МЧЖга қарашли дорихонада ўтказилган текширувда, дорихона раҳбари М.Ш. харидорга 3 дона “Регапен” номли дори воситасини 60 минг сўмга сотганлиги аниқланди. Ушбу дорихонадан тегишли ҳужжатлари бўлмаган 322 дона “Регапен” номли дори воситаси ашёвий далил сифатида олинган. 

 

Шунингдек, департаментнинг Шайхонтоҳур туман бўлими томонидан ИИБ ходимлари билан ўтказилган тезкор тадбирда ҳам кузатилди. Фуқаролар Ш.Х. ва Б.Х.лар харидор М.га 20 дона “Тропикамид” ва 42 дона “Регапен” номли кучли таъсир қилувчи дори воситасини 100 АҚШ доллари ва 1 миллион сўмга сотган вақтида ушланди. Уларнинг яшаш хонадонидан 435 дона “Регапен”, 201 дона “Селофен” ва 23 дона “Тропикамид” номли дори воситаси ашёвий далил сифатида олинган.

 

Бундан ташқари, департамент ҳамда ДХХнинг Юнусобод тумани бўлимлари томонидан ИИВ ходимлари билан ҳамкорликда ўтказилган тезкор тадбирда ҳам “K” МЧЖ таъсисчиси Х.Э. ва бошқалар 5 дона “Зардекс” номли кучли таъсир қилувчи дори воситасини 100 минг сўмга сотганлиги маълум бўлди. Ж.И.нинг бошқарувидаги автомашинадан 100 дона ушбу дори воситаси ашёвий далил сифатида олинган.

 

Мазкур ҳолатлар юзасидан Жиноят кодексининг 186-3-моддаси (таркибида кучли таъсир қилувчи моддалар мавжуд бўлган дори воситаларини рецепт бўйича чакана реализация қилиш тартибини бузиш) ва 251-1-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят ишлари қўзғатилди.

 

Ҳозирда тергов ҳаракатлари ўтказилмоқда.

 

Эслатиб ўтамиз, аввалроқ  Тошкентда кучли таъсир этувчи дори воситаларини сотаётган дорихоналар аниқлангани, Тошкентда кучли таъсир қилувчи дори воситаларининг ноқонуний савдоси фош бўлгани, Наманганда "Lacetti"дан ҳужжатсиз 80 миллион сўмлик дори-дармон топилгани ҳамда Ширин шаҳрида кучли таъсир қилувчи дори воситаларини сотаётган шахс ушлангани ҳақида хабар берилганди.