Бош прокуратура ҳузуридаги Иқтисодий жиноятларга қарши курашиш департаментининг хабар қилишича, департаментнинг Учтепа туман бўлими томонидан ўтказилган тезкор тадбирда, фуқаро М.М. ва бошқалар фуқаро А.га 15 дона “Тропикамид” номли кучли таъсир қилувчи дори воситасини 1,5 миллион сўмга сотган вақтида ушланди.
Қайд этилишича, уларнинг ёнида бўлган 41 дона “Тропикамид”, 22 дона “Регапен”, 18 дона “Селофен” ва 17 дона “Зардекс” номли дори воситалари ашёвий далил сифатида олинган.
Таъкидланишича, ҳудди шундай ҳолат департаментнинг Мирзо Улуғбек туман бўлими томонидан ўтказилган тезкор тадбирда ҳам фуқаро Н.Қ. фуқаро Б.га 4 дона “Регапен” номли кучли таъсир қилувчи дори воситасини 100 минг сўмга сотган вақтида қўлга олинди.
Аниқланишича, унинг ёнида бўлган 111 дона “Зардекс”, 27 дона “Регапен”, 11 дона “Селофен” ва 8 дона “Тропикамид” номли дори воситалари ашёвий далил сифатида олинган.
Мазкур ҳолатлар юзасидан Жиноят кодексининг 186-3-моддаси (таркибида кучли таъсир қилувчи моддалар мавжуд бўлган дори воситаларини рецепт бўйича чакана реализация қилиш тартибини бузиш) билан жиноят ишлари қўзғатилиб, тергов ҳаракатлари ўтказилмоқда.
Эслатиб ўтамиз, ярим тунда кучли таъсир қилувчи дори воситаларини олиб юрган шахслар ушланганди.
Аввалроқ кучли таъсир қилувчи дори воситаларининг ноқонуний савдосига чек қўйилгани, Тошкентда кучли таъсир этувчи дори воситаларини сотаётган дорихоналар аниқлангани, Сирдарёда кучли таъсир қилувчи "Тропикамид" дори воситасини сотаётган шахс ушлангани ҳамда ноқонуний дори воситалари ортидан даромад олиш режаси амалга ошмагани ҳақида хабар берилганди.