Тошкентда профилактика инспектори сувга чўкаётган одамни қутқариб қолди

 

 

Ижтимоий тармоқда Тошкент шаҳар ИИББ ходими чўкаётган фуқарога ёрдам кўрсатгани акс этган видео тарқалди. Мазкур ҳолат юзасидан ИИББ муносабат билдирди.

 

Маълум қилинишича, 30 сентябрь куни тахминан соат 21.30 да 37 ёшли М.М. маст ҳолатда бўла туриб, эҳтиётсизлик оқибатида Сергели тумани "Қорасув" маҳалласи ҳудудидан оқиб ўтадиган каналга тушиб кетган. Сувдан мустақил чиқа олмаган фуқаро атрофдагиларни ёрдамга чақирган. Шу пайтда ўша ҳудуддан ўтиб кетаётган Сергели тумани ИИО ФМБ 3-сон ИИБ профилактика инспектори, лейтенант Алибек Махмарайимов чақириқни эшитиб, ёрдамга шошади ва сувга чўкаётган фуқарони қутқариб қолган.

 

Таъкидланишича, лейтенант А. Махмарайимов “тез ёрдам”га қўнғироқ қилиб, шифокорларни чақирган ва унга биринчи тиббий ёрдам кўрсатган.

 

"Ҳурматли ҳамшаҳарлар ва Тошкент меҳмонлари, илтимос, сув ҳавзалари яқинида эҳтиёт бўлинг" — дейилади хабарда.

 

Эслатиб ўтамиз, ўзини кўприкдан ташламоқчи бўлган ўсмир қутқариб қолинганди.

 

Аввалроқ Наманганда каналга чўкиб кетган 10 ёшли боланинг жасади топилганди. Шунингдек, вилоятда “Nexia” бошқарувини йўқотилиши сабабли каналга тушиб кетгани, “Сирдарё” дарёсида 26 ёшли фуқаро чўкиб кетгани ҳамда Бўстонлиқда 150 метр баландликдан "Spark" ҳайдовчиси омон қолгани ҳақида хабар берилганди.